CEBU, Philippines — Milansang sa ilang ikaduhang daog ang Goutsource Solution International (GSI) ug ang JLT Sorbeteros pinaagi sa pagpilde sa tagsa-tagsa nilang kaatbang sa Donling Cup 2024 niadtong Domingo diha sa Ateneo de Cebu old campus sa Mango Avenue, Cebu City.
Ang GSI mipukan sa Gavens Water Refilling Station sa iskor 64-56, samtang ang JLT milubong sa Bucket Blazers, 58-40 alang sa ilang 2-1 nga baraha ning maong liga nga giorganisar sa Brothers Ball League ubos sa liderato ni Marvin Sillar.
Si Ernie Inocencio, kinsa nangu sa opensa sa GSI ang napiling best player of the game human mipupo og 20 puntos, pito ka rebounds ug pito sab ka assists. Sila si VM Cempron ug Dan Cardenas mitampo'g 12 puntos matag usa, samtang si Kent Sillar miamot og 10 puntos alang sa GSI nga miarangkada human magtabla ang iskor, 52-all sa katapusang 4:23 minutos sa fourth quarter.
Ang 3-point shot ni Cempron naghatag og 60-52 nga bentaha sa GSI ni Ivan Llesol sa nahabiling 2:56 sa duwa ug sukad niadto wala na makarekober pa ang Gavens ni Kevin Mamac nga wala pa'y daog sa duha ka duwa. Nangu sa Gavens mao si Eric Sanchez nga mikamada'g 18 puntos, gisundan ni Scott Kier Alindajao nga dunay 13 puntos.
Sa laing duwa, ang JLT Sorbeteros ubos sa pagpangulo ni Joshua Banaag milubong sa Bucket Blazers sa iskor nga 58-40.
Si Banaag mirehistro'g 20 puntos, pito ka rebounds ug unom ka assists aron ilhong best player of the game. Sila si Jeremiah Rivera ug Jason Inocencio nagtampohay og 10 puntos sa JLT ni Jack Leonard Tagacanao nga duna na'y 2-1 record.
Ang 0-2 nga Bucket Blazers ni Chyrus Blen gipangulohan ni Jumel Batal nga dunay 16 puntos, gisundan ni AJ Geronca sa iyang 11 puntos.