Kabayen-an sa Mandaue giedukar sa ilang mga katungod

CEBU, Philippines — Gituki ang mga katungod sa kababayen-an atol sa gipahigayong women’s summit sa gilusad nga 18 Days Activism for the Elimination of Violence Against Women.

Sa maong kalihokan giedukar ang mga partisipante sa ilang mga katungod isip babaye aron kalikayan ang mga diskriminasyon ug ang pagpangabuso sa kababayen-an sa komunidad.

Sila ang magsilbi nga giya o tingog sa ilang matag barangay aron tabangan ang kababayen-an nga biktima sa pagpangabuso. Gihimo ang women’s summit sa Dakbayan sa Mandaue alang sa hugot nga pagprotekta sa kababayen-an ug kabataan ingon man masilotan ang mga makalapas sa balaod nga “Violation Against Women and Children”.

Si City Councilor Cynthia Cinco Remedio, Atty. Regal Oliva, Kaabag Mandaue President Karla Victoria Cortes ug Zonta Club of Cebu II pinaagi ni Dr. Elsa Basubas ug mga miyembro maoy nagpasiugda sa women’s summit.

Ang pagrespeto ug pagprotektar sa kababayen-an hugot nga gisuportaan ni Kaabag Founder Mayor Jonas Cortes.  Ang kasayuran nga nakutlo atol sa women’s summit daku kaayo nga oportunidad sa kababayen-an aron ipakatap sa komunidad ang ilang mga katungod. — /BDB (BANAT NEWS)