School Feeding Program gilusad sa Kapitolyo
CEBU, Philippines — Gilusad na sa Probinsya sa Sugbo ang Sugbo School Feeding Program niini diin ang mga tinun-an nga na enroll sa DepEd ang pakan-on sa Kapitolyo uban sa mga partners o kauban niini lukop lalawigan.
Si Gobernador Gwendolyn Garcia maoy nangulo sa paglusad niini didto sa Tabogon Central School diin sobra 800 ka mga tinun-an sa maong eskwelahan ang napakaon sa masustansiya nga pagkaon. Sumala sa Capitol Information Office ang tanang central school lukop Probinsya ang niapil sa seremonyas pinaagi sa zoom nga giproject sa mga LED walls ug gibroadcast usab pinaagi sa news portal sa Kapitolyo.
Mokabat sa P197 million ang inisyal nga pundo alang sa maong programa nga giapilan sa 1,494 sa mga pampublikong tunghaan sa Probinsya lakip na ang mga skwelahan sa mga independent city school divisions sa Mandaue, Talisay, Naga, Carcar, Toledo, Danao, ug Bogo.
Ang maong feeding program ipahigayon matag school days gikan sa Lunes hangtud Biyernes ug molungtad hangtud matapos ang school year.
Base sa record, ang DepEd Cebu Province, adunay 878,619 ka mga tinun-an sa karon nga school year gikan sa Kindergarten ngadto sa Senior High School. (BANAT NEWS)
- Latest
