Libreng dialysis sa mga kabus gimando ni Garcia sa mga ospital

CEBU, Philippines —  Ang tanang kabus nga Sugboanon nga accredited sa mga social workers ang libre nga makabenepisyo sa dialysis service sa mga tambalanan nga gidumala sa Probinsya sa Sugbo.

Kini nalatid sa memorandum ni Gobernador Gwendolyn Garcia sa tanang hepe sa 16 ka provincial ug district hospitals sa Sugbo.

"For non-indigent patients, a standard fee of two thousand five hundred pesos (P2,500) per dialysis session shall apply" pagbasa sa memorandum ni gobernador Garcia.

Si Garcia miluwat sa maong memorandum human usa ka pasyente nga nagdialysis nga nagpatabang sa gobernador human kini matod pa gipapalit sa pipila ka supplies alang sa iyang dialysis treatment.

Matud ni Garcia nga dili angay pabayron ang mga kabus nga pasyente sa pagpa dialysis niini sa mga tambalanan nga gidumala sa Probinsya.

Sa taho sa Capitol Information Office ang maong pasyente nga naka wheelchair misulti ni Garcia nga gipapalit siya sa supplies tungod kay walay stocks ang hospital.

“Busa, i-anunsyo ko kini karon, ug kanang Carcar, paminaw mo diha, dili angay nga pabayron ang pasyente sa bisag unsang supply kay libre ka na. Ang Probinsya sa Sugbo man gyud ang mopalit niana,” matud ni Garcia atol sa Caravan of Provincial Government Services sa Alcantara niadtong Nobiyembre 9.

Ang Probinsya sa Sugbo adunay tulo ka dialysis centers nga nahimutang sa Balamban Provincial Hospital; Carcar Provincial Hospital ug Danao Provincial Hospital.

Gipahimug-atan ni Garcia nga ang kakulang sa tambal ug medisina sa hospital dili angay mahimong problema sa pasyente.

Samtang dugang dialysis center ang ablihan sa Capitol sunod tuig human nga laing negosasyon ang gihimo sa Kapitolyo ug sa Medtronix Medical Supplies and Equipment alang sa pag install ug pagmentenar sa 45 ka regular nga hemodialysis machines.

Kini bahinon sa mga district hospital sa Camotes, Bantayan ug Balamban Provincial Hospital. — MEL (BANATNEWS)