CEBU, Philippines — Nagtinguha si Cebu City development planner, Architect Yumi Espina nga magbutang og limitasyon sa gihabugoon ug floor area sa mga tukorong mga buildings sa siyudad nunot aning nasinating grabeng kainit nga masinati sa mga tawo panahon sa tinginit.
Gitawag kini og “heat island effect,” usa kini ka phenomenon kon diin ang mga siyudad mas init og temperature itandi sa mga rural areas nga duna pay lapad nga yuta ug mga kakahuyan nga motuhop ang kainit. Karon sementado na halos ang tanang lugar sa siyudad, gikan sa mga aseras, mga buildings, ug mga parking lots mao nga magbanda-banda lang ang kainit sa palibot hinungdan sa pagsaka sa temperatura.
Ang US Environmental Protection Agency miingon nga kining pagsaka sa temperatura mao ang hinungdan sa pagsaka sab sa gidaghanon sa mga nasakit dala sa kainit sa panahon, dunay uban namatay tungod niini ug nakapataas sab sa singil sa kuryente tungod sa paggamit og air conditioning unit ug pagsaka sab sa polusyon.
Apan mahitabo lang kini kun maaprubahan ang zoning ordinance nga ilang giduso ngadto sa Manila gikan sa Department of Human Settlements and Urban Development.
Kay pinaagi niini ang City Planning and Development Office magbutang na unya og building height limit ug floor area ratios sa tanang mga gustong magtukod og edipisyo sa sulod sa siyudad. Gikinahanglan na nga adunay mahibiling dapit nga kahungawan sa kainit ug maagian og hangin aron dili moinit ang palibot. Hinuon adunay laing sugyot nga pamaagi ang US EPA, kun unsaon pagpamenus sa kainiton sa sud sa mga siyudad , kini mao ang green infrastructure improvements, pagpananom og daghang mga punoan sa kahoy, ug pagtanum og mga kahoy sa ibabaw sa mga buildings.
Samtang nagpaabot pa og tubag sa DHSUD, si Espina mirekomendar sa pagtukod og planning and designs division ug project monitoring division nga gilangkuban og mga job orders nga architects ug engineers.
“Sunod ta sa giingon ni Mayor nga right-sizing na ‘ron dili lang pataka tag kuhag mga empleyado ba nga walay capability…In the first place we are using people’s money…Ato gyud ng gamiton ug sakto ang kwarta sa publiko ba,” si Espina miingon. — /IBM (BANAT NEWS)