Mga tinun-an ug mga trabahante nakadawat og tabang pinansyal
CEBU, Philippines — Si Senator Imee Marcos maoy nangulo sa pag panghatag sa kapin sa P17 million nga balor sa financial assistance ngadto sa mga tinun-an ug mga trabahante atol sa iyang duha ka adlaw nga pagbisita sa dinhi sa Sugbo.
Niadtong Biyernes, Nobiyembre 10, 2023 ang senador maoy nangu sa pag apod apod sa P3,000 nga educational assistance ngadto sa 1,724 student-beneficiaries diha sa Cebu Technological University Main Campus dinhi sa Sugbo.
“Alam ko kulang na kulang talaga yan pero at least may naibigay tayo na ayuda sa atong mga kabataan,” suma pa ni Marcos. Si Marcos mibisita usab sa Lapu-Lapu City aron ipanghatag ang P3,000 nga tabang pinansyal sa 4,000 ka mga trabahante nga nawad-an og trabaho sa Mactan Export Processing Zone.
Sa iyang pagpamung gipadayag ni Marcos nga ang iyang amahan mao ang nagsugod sa unang MEPZ dinhi sa Cebu aron mouswag ang ekonomiya ug makahatag og dugang trabaho.
Suma pa niini nga ang maong kantidad usa lang ka ayuda nga gitumong aron maibanan ang kalisdanan sa mga trabahante nga nawad-an og trabaho nga makasapar sa kamahal sa mga palaliton ilabi na sa pagkaon.
Uban ni Marcos sa pagpanghatag sa ayuda mao si Lapu-Lapu City Mayor Junard 'Ahong' Chan ug Lapu-Lapu City Lone District Representative Cindi King-Chan nga gitambongan usab ni Shalaine Marie Lucero ang regional director sa Department of Social Welfare and Development-7. Ang pag apod apod sa financial assistance gipaagi sa Assistance to Individuals in Crisis Situation sa DSWD.
Apil sa nitambong sa kalihukan mao sila si Lapu-Lapu City Councilor Annabeth Cuizon, Department of Social Welfare and Public Employment Service Office head Kim Francisco, City Social Welfare and Development Office head Junard Abalos, ug ubang mga bisita. — /MEL (BANAT NEWS)
- Latest
