CEBU, Philippines — Gidakop ug gipamulta ang drayber sa dumptruck nga hapit mobangga sa auto ug nagmotorsiklo diha sa Cebu South Coastal Road (CSCR) habig sa Barangay San Roque, Dakbayan sa Talisay niadtong Dominggo sa buntag.
Ang panghitabo nakuha sa CCTV footage sa command center hinungdan nga naalarma kini sa mga sakop sa City of Talisay-Traffic Operation Development Authority (CT-TODA).
Nakita sa video nga kusog ang pagpadagan sa dumptruck nga nagsunod sa auto apan nagstop na ang signal sa traffic light hinungdan nga nihunong ang auto.
Pwerteng tunob sa brake sa drayber sa dumptruck ug gilubag pa ang manobela aron di maharos ang auto.
Ang traffic cones mao ang naharos ug naguba ug hapit sab maigo ang nagmotorsiklo sa kilid.
Matud pa ni Jonathan Tumulak, pangu sa CT-TODA nga admitado ang drayber nga adunay deperensya sa brake sa sakyanan ug nagdali sab siya nga mauli sa Dakbayan sa Toledo.
Nagkanayon si Tumulak nga ilang giisyuhan og reckless driving ang drayber ug nakamulta og P1,000.
Ilang gipatawag ang operator sa truck aron maestorya apan kun di kini magpakita hayan sila mosumiter og report ngadto sa Land Transportation Office (LTO). (BANAT NEWS)