CEBU, Philippines — Nitahan sa iyang kaugalingon ngadto sa kapolisan sa Lungsod sa Liloan ang suspetsado sa nahitabong pagpamusil diha sa usa ka subdivision sa Barangay Sta. Cruz niadtong Sabado sa hapon.
Ang suspetsado mao si Mark Allen Jubay Tundag, hingkod ang panuigon ug gwardiya sa maong subdivision samtang ang biktima kinsa anaa pa sa tambalanan mao si Robby Bueno, hingkod usab ang panuigon ug trabahante kini sa mao usab nga subdivision.
Nasayran nga ang biktima ug ang suspek nagkalalis human si Bueno giingong nisulod sa subdivision nga naka-shorts lang ug gikasab-an si Tundag sa safety officer sa subdivision tungod kay gitugotan ang biktima nga makasulod sa subdivision.
Sa paggawas sa biktima sa subdivision gikomprontasi kini ug nahitabo ang panaglalis.
Giingong nisamot kainit ang ulo sa suspek human kini gibaharan sa biktima nga bunalan og tubo hinungdan nga gipusil ni Tundag si Bueno gamit ang iyang service firearms.
Human sa nahitabong pagpamusil daling nisibat ang suspek samtang ang biktima daling gidala ngadto sa tambalanan gumikan sa naangkon nga samad pinusilan.
Mga pasado alas 4:00 sa hapon sa samang adlaw si Tundag boluntaryong nitahan sa iyang kaugalingon sa Liloan Municipal Police Station.
Gitugyan usab sa suspek ngadto sa mga polis ang 5-shot nga kalibre. 38 revolver nga kolor itom nga adunay mga buhing bala nga maoy gigamit niya pagpusil sa biktima.
Gikustodiya na karon sa kapolisan ang suspek ug gikatakda nga pasakaan og kasong frustrated murder ug kalapasa sa Akta Republika 10591 kun “An Act Providing for a Comprehensive Law on Firearms and Ammunition and Providing Penalties for Violation thereof”.
Giingong andam mopasaka og kaso ang biktima batok sa suspetsado. — /BDB (BANAT NEWS)