Pagtudlo og bag-ong DA secretary gihangop

CEBU, Philippines —  Gihangop sa Bantay Palengke Convenor Lester Codog ang pagtudlo kang Francisco Tiu Laurel Jr. isip agriculture secretary taliwa sa nagpabilin nga suliran sa pagkaon sa kadaghanan sa mga Pinoy. 

Sa iyang pamahayag siya miingon nga panahon na usab nga dunay itudlo ug tahasan sa pagpangita og solusyon ug maka focus kabahin sa isyu sa pagkaon ug agrikultura.

Gipasabot ni Codog nga kun ang ubang palaliton mikunhod sama sa sibuyas apan kadaghanan sa mga nag-unang palaliton nagpabilin gihapon nga taas ang presyo sama sa bugas, itlog ug utanon.

 Dugang pa ni Codog nga andam sila nga makig-alayon ni Secretary Laurel aron maprothian ang katungod sa mga konsumidor ug nanghinaut siya nga masulbad ang kamahal sa presyo sa mga palaliton. Sa iyang bahin si House of Representatives Minority Leader ug 4Ps party-list Representative Marcelino “Nonoy” Libanan miingon nga ilang gihangop ang pagtudlo ni President Ferdinand Marcos Jr. kang Laurel Jr. aron maka-focus na usab kini sa iyang gimbuhatan isip chief executive.

Sa nasayran si presidente Marcos maoy naghupot sa posisyon isip of DA Secretary sud sa kapin sa usa ka tuig sukad sa pagsugod sa iyang termino.

Gidasig usab ni Libanan ang presidente nga motudlo og bag-ong Migrant Workers secretary nonot sa nagpadayong gubat sa Israel ug Hammas nga posibleng modaku ug makahatag og peligro sa mga Filipino workers sa Israel. Gikan sa The Freeman/MEL (BANAT NEWS)