Tig-ayo sa mga armas  sa gun-for-hire sikop

CEBU, Philippines —  Nadakpan sa Provincial Mobile Force Company ug Provincial Intelligence Unit sa Bohol Police Provincial Unit niadtong Biyernes sa buntag ang usa ka lalaki nga giingong tig-ayo og armas sa mga gun-for-hire sa Lungsod sa Carmen Probinsiya sa Bohol.

Ang kapolisan sa Bohol niimplementar sa search warrant batok sa suspetsado nga giila sa pangalan nga “Danny”, 47-anyos, residente sa Purok 2, Barangay Villaflor, Lungsod sa Carmen.

Nakuha sa kapolisan gikan sa suspetsado ang nagkalain-laing kalibre sa armas nga gilangkuban sa usa ka .9mm sub-machine gun ug usa ka bala ug magazine niini; mga kalibre .38 nga revolver; bala sa shotgun, bala sa .45 caliber ug .30 caliber ug .38 caliber.

 Si Regional Trial Court (RTC) Judge Jorge Espinal sa Branch 51 sa Lungsod sa Carmen, Probinsiya sa Bohol ang niluwat sa search warrant batok sa suspetsado niadtong Oktubre 27, 2023.

Nasayran nga gipaubos sa intelligence monitoring ang suspetsaso nga giingong mamuhatay ug mangayohay og armas ngadto sa nahisgutang lungsod ug giingong mo ayo usab kini sa mga armas sa gun-for-hire personalities.

Gipalawoman na kapolisan sa Bohol ang ilang imbestigasyon aron mailhan ang tag-iya sa mga nakompiska nga armas.

Maghimo usab og ballistic examination sa Forensic Unit aron pag-verify kon ang maong mga armas gigamit sa mga nanglabay nga shooting incidents sa Probinsiya. (BANAT NEWS)