CEBU, Philippines — Nakatala og 51,963 ka mga inbound ug outbound passengers ang Cebu Port Authority sa mga pantalan sa Sugbo.
Ang katawhan nanguli sa ilang tagsa-tagsa ka probinsya aron mobotar sa Barangay ug Sangguniang Kabataan Elections karong Oktubre 30, 2023 ug pag-obserbar sa adlaw sa mga santos ug minatay sa Nobyembre 1 ug 2.
Sa 51,963 ka mga pasahero 20,648 niini ang arrivals ug 31,315 ang departure.
"Day 1 of oplan last year 2022 (October 28, 2022) Passenger monitoring was only around 6k, day 1 this year at 51k tungod sa kataas sa bakasyon daghan nagbiyahe", sumala ni Maryknoll Bolasa, Public Relations Officer sa Cebu Port Authority CPA.
Una niini, ang Cebu Port Authority subling nipalihok sa ilang Oplan Biyaheng Ayos sugod kagahapon hangtud sa Nobiyembre 5, 2023 ug gilauman nila nga modagsa ang daghang pasahero nga manguli sa ilang mga probinsiya.
Naka-heightened alert ang tanang pantalan sa Sugbo alang sa napulo ka adlaw nga Oplan Biyaheng Ayos aron masiguro ang kaluwasan ug seguridad sa mga biyahidor.
“As early as the start of October, we have already coordinated with our partners from the Cebu’s Maritime Sector and enforcement agencies in preparation for the expected surge of passengers ahead of the Barangay and SK elections and Undas 2023", matod ni CPA General Manager Francisco C. Comendador III.
Ang CPA mipakatap og dugang security personnel sa tanang pantalan sa Sugbo alang sa secured, reliable, convenient ug uninterrupted port operations.
Sa panahon sa Oplan Biyaheng Ayos gilauman ang passenger traffic nga molapas sa 500,000, malabwan niini ang natala sa miaging tuig nga 30,000 ka pasahero kada adlaw ug naa lang sa 250,000 ka pasahero sa Undas 2022. (BANAT NEWS)