Gwen uyon nga ibalhin ang South Bus Terminal
CEBU, Philippines — Uyon si Gobernador Gwendolyn Garcia sa sugyot ni Cebu City Mayor Michael Rama nga ibalhin na ang Cebu South Bus Terminal (CSBT) ngadto sa South Road Properties (SRP) o sa laing lugar.
“I really agree with Mayor Mike that pretty soon the South Bus Terminal must be transferred" matud ni Garcia.
Gitug-an ni Garcia nga plano sa Kapitolyo ang pag-ipon sa CSBT ug sa North Bus Terminal (CNBT).
Una niini si Rama nagkanayon nga angayan na ibalhin ang CSBT alang sa pagpatuman na sa Cebu Bus Rapid Transit (CBRT), aron usab dili mograbe pa ang trapiko sa may Natalio Bacalso (N. Bacalso) kon asa nahimutang ang provincial-run terminal.
Ang North Bus Terminal CNBT kasamtangang nahimutang sa parking space sa usa ka dakong mall sa may North Reclamation Area.
Subay sa plano nga iusa na ang South ug North Bus Terminal, si Garcia nagkanayon nga ang Kapitolyo abli sa partnership uban sa pribadong sektor alang sa katukoran sa integrated terminal sa Probinsya sa Sugbo.
Kun hingpit na nga mabalhin ang CSBT, si Garcia nagkanayon i-develop gihapon sa Kapitolyo ang luna nga nahimutangan niini.
“That is also a very ideal, commercially viable property. Of course I will never dispose of it, but we will develop it, again open to private sector partnership, in order to realize more revenues for the Province of Cebu,” dugang sa gobernador. —/MEL (BANAT NEWS)
- Latest
