Upat ka command center sa PRO-7 mogasto og P29 milyones

CEBU, Philippines — Moabot sa P29 milyones ang pundo alang sa katukuran sa upat ka Command Center sa Police Regional Office (PRO)-7 nga gamiton ilabi na karon nga nagkaduol ang Barangay ug Sangguniang Kabataan Elections 2023.

Usa sa dunay bag-ong Command Center mao Cebu Police Provincial Office diin gipahigayon kagahapon ang turnover ceremony nga gitambungan ni Police Colonel Brent Madjaco, Deputy Regional Director for Administration sa PRO-7.

Suma ni Police Colonel Percival Zorilla, Provincial Director sa Cebu Police Provincial Office ang Command Center nga gi-turnover mahimong center sa komunikasyon ug koordinasyon sa tanang ahensiya sa gobyerno.

“Mao nang naa tay small conference room para diri mi magtapok para dali ang coordination and then we can put other personnel from different agencies nga ilahang ipadala diri para mag monitor sad”, matud ni Col. Zorilla.

Samtang gipahibawo ni Col. Zorilla moabot sa kapin dos mil ka mga police ang ibutang sa 1,065 polling centers sa Probinsiya sa Sugbo.

Duna sab sila’y dugang 303 ka personnel gikan sa Joint Task Group Cebu, apil na sab ang sa Philippine Coast Guard nga motabang og bantay sa piniliay.

Ang duha ka lugar sa Probinsiya nga nabutang sa areas of concern padad-an sab og dugang tawo nga magbantay sa lugar.  Nasayran nga gihingusgan sa kapolisan sa Probinsiya sa Sugbo ang ilang operasyon batok sa nagkalain-laing krimen.

Gikan sa Oktubre 16 hangtud sa 22, 2023 ang CPPO nakadakop og 33 ka drug personalities ug nakakompiskar og 244.56 gramos sa shabu nga mobalor og P1.6 million. Nakadakop sab sila og 36 ka wanted persons dii upat niini most wanted persons ug 32 ang other wanted persons.

Sa kampanya batok illegal nga drugas nakapahigayon sila og 45 ka operasyon diin pito ang nadakpan ug 45 ka low powered firearms ang nakompiskar. (BANAT NEWS)