Mga barko sa China nibabag ug nabangga sa mga barko sa Pilipinas
CEBU, Philippines — Ang mga barko sa China nibabag ug nabangga sa mga barko sa Pilipinas nga nagdala og suplay alang sa mga tropa nga na-stationed sa BRP Sierra Madre sa West Philippine Sea, matud sa mga awtoridad kagahapon.
Sa usa ka pamahayag, ang National Task Force for the West Philippine Sea nagkanayon nga ang “dangerous blocking maneuvers” sa China Coast Guard vessel 5203 maoy hinungdan sa pagbangga niini sa Unaiza May 2, usa ka Armed Forces of the Philippines-contracted indigenous resupply boat sa 13.5 nautical miles sa silangang amihanang-sidlakan sa grounded nga barkong iggugubat sa Ayungin Shoal kagahapon sa buntag.
“The provocative, irresponsible, and illegal action of CCGV 5203 imperiled the safety of the crew of Unaiza 2”, matud sa task force.
Ang NTF-WPS nagkanayon usab nga usa ka Chinese maritime militia vessel ang nibangga sa usa ka patrol vessel sa Philippine Coast Guard sa gibana-bana nga 6.4 nautical miles sa amihanan-sidlakan sa Ayungin Shoal atol sa samang resupply mission.
Matud sa mga awtoridad, nagpadayon pa ang misyon diin ang supply boat nga Unaiza Mayo 1 nakaabot sa BRP Sierra Madre.
Ang task force nagkanayon nga ang mga aksiyon sa CCG ug sa Chinese maritime militia nakalapas sa soberaniya nga mga katungod ug hurisdiksiyon sa Pilipinas, ug wala motahod sa international maritime conventions ug sa 2016 arbitral award diin wala kini giila sa Beijing.
Base sa taho sa Reuters, Ang China Coast Guard nagkanayon nga ang pagbabag sa mga barko sa Pilipinas subay sa balaod gumikan kay nag-transport kini og illegal constructed materials.
Giingong gipamatud-an sa China ang soberaniya sa halos tibuok South China Sea, bisan pa sa hukom sa international court nga nag-isip nga walay legal nga basehanan ang baroganan niini.
Ang coast guard, navy ug maritime militia nga mga barko niini kanunay nga mobabag sa mga patrol ug suplay sa mga barko sa Pilipinas. — /BDB (BANAT NEWS)
- Latest
