Long weekend hugot bantayan

CEBU, Philippines — Mga polis nga i-deploy aron magbantay sa seguridad sa Oktubre 30, 2023 sa Barangay ug Sangguniang Kabataan Elections diretso na nga pabantayon sa Adlaw sa mga Santos ug sa Kalag-kalag sa Nobiyembre 1 ug 2 ning tuiga. Ang duha ka sunod nga mga kalihukan natuki ug gipangandaman sa PRO-7 atol sa ilang gihimong command conference sa miaging adlaw.

Matud ni Police Lt. Col. Gerard Ace Pelare, tigpamaba sa PRO-7, ang mga polis nga magbantay sa eleksyon mao sab ang magbantay sa adlaw sa mga santos ug mga minatay.

Ang Oktobre 28 adlaw nga Sabado, Oktobre 29 Domingo, dayon Oktobre 30, adlaw sa BSKE nga special non –working holiday, Oktobre 31 adlaw nga Martes gideklarar ni Presidente Ferdinand Marcos Jr. nga special non-working holiday tungod kay bisperas kini sa Adlaw sa mga Santos sa Nobiyembre 1, dayon sundan sa Nobiyembre 2 nga adlaw sa mga minatay.

Giklaro ni Pelare nga dili lang mga sam-ang bantayan sa kapulisan apan apil na ang mga business establishments, tourist destinations, mga malls ug mga beach resort sanglit ang mga tawo manguli sa ilang tagsa-tagsa ka Probinsiya tungod kay taas ang adlaw sa bakasyon.

“Kining economic activity this long weekend is very crucial that is why ang atong mga police mag gwardiya sa pawnshop, mag gwardiya sa mga gasolinahan, mag gwardiya sa mga business establishments, mga gwardiya sa mga malls, although we haven’t monitored any personalities nga possibleng mag perpetrate aning mga krimen but ang atoa is proactive patrolling,” sigon ni Pelare.

Sigon ni Pelare nga mando gyud ni Brigadier General Anthony Aberin nga sa long weekend ang kapulisan naa sa karsada ug sa mga lugar nga tapukan og daghang tawo.

“The police are very well prepared in making sure nga kung dili man gani tanan areas mabutangan katong areas of convergence mabutangan gyud,” sigon pa niya.

Gibutyag sa opisyal nga duna sila’y red teaming operations nga gilangkuban sa Regional Headquarters ug Provincial ug City Headquarters personnel nga mohimo og inspeksyon.

Apan giwhag sa kapulisan sa publiko nga dili mokompyansa panahon sa ilang paglakaw ilabi na atol sa kalag-kalag sanglit mao usab kini ang panahon nga mogara ang mga kriminal ug labing maayo nga dili magdalag mga mahalong butang panahon sa pag bisita sa ilang mahal sa kinabuhi nga mitaliwan na sa laing kalibutan. (BANAT NEWS)