Duterte hatagan og Order of Rajah Tupas

CEBU, Philippines — Ang konseho sa Dakbayan sa Sugbu gikatakdang mopasidungog pinaagi sa paghatag og Order of Rajah Tupas kang kanhi presidente Rodrigo Duterte tungod sa iyang serbisyo sa nasud ug sa siyudad sa Sugbo panahon sa iyang termino.

Ang pasidungog ihatag atol sa Sangguniang Panglungsod’s Gala Night karon Oktobre 25, 2023 sa usa sa mga hotel sa dakbayan.

Ang resolusyon gipangamahan ni Vice Mayor Raymond Alvin Garcia nga giaprobahan sa City Council atol sa ilang regular session niadtong Oktobre 18, 2023.

Si Duterte maoy ikaduha nga hatagan sa maong dakong pasidungog human una niini mao si kanhi Presidential Assistant fot the Visayas Michael Lloyd Dino niadtong nakalabay nga Disyembre sa nilabay nga tuig.

Giila usab sa konseho sa dakbayan ang kagikan ni Duterte nga usa ka Sugbuanon nga taga Danao City, pag-umangkon siya ni kanhi Cebu City Mayor Ramon Duterte ug ig-agaw ni kanhi City Mayor Ronald Duterte. Ang mga nahimo sa kanhi presidente maoy basihan sa konseho sa siyudad sa paghatag nila ug pasidungog niini. (BANAT NEWS)