"Pusher" patay human pusila

CEBU, Philippines — Patay ang 34-anyos nga e-bike driver human pusila sa wala mailhing kriminal niadtong Martes sa gabii diha sa Sitio Ipil-Ipil Alaska, Barangay Mambaling, Dakbayan sa Sugbo.

Ang biktima giila sa kapolisan nga si Librado Teopan Talledo, molupyo sa Sitio Tinabangay Alaska, Barangay Mambaling nakaangkon og mga samad pinusilan ulo ug likod.

Base sa imbestigasyon sa Mambaling Police Station 11 pinangulohan ni Police Major Jonathan Bethooven Taneo nga ang biktima usa ka street pusher.

Samtang si Police Master Sergeant Anthony Adizas, imbestigador sa Mambaling Police Station nagkanayon nga ang biktima wala na kini hatagi sa iyang agawon gumikan kay giingong naka-tumbling o wala mabayri ang gikuha niini nga item.

Giingong niadtong gabhiona nakabaliya na kini og walo ka putos apan imbes drugas asin ang sulod ug kini maoy gitan-aw nga rason sa kapolisan nga hinungdan sa krimen.

Matud sa kapolisan nga ang biktima mogamit og ilegal nga drugas ug base sa gisulti sa asawa niini bag-o lang sila nagbalik human nagbuwag.

Sa wala pa ang insidente sa pagpamusil ang biktima giingong matulog na unta apan niabot ang ig-agaw niini ug giagni kini nga aduna sila’y adtuon.

Ang Mambaling Police Station aduna na kini person of interest sa nahitabong krimen.

“Naa naman tay gisubay nga tawo nga giadto nato ganinang kadlawon mga alas 2:00, wala didto”, matud ni Adizas.  Nasayran nga ang gigamit sa suspek sa pagpusil sa biktima kalibre .45 nga pistol. (BANAT NEWS)