CEBU, Philippines — Mokabat sa 58 ka mga diocese ang gipaabot nga motambong sa National Retreat for Priest 2023 nga gikatakda nga ipahigayon dinhi sa Dakbayan sa Sugbo karong umaabot Nobiyembre 7 ngadto sa 9, 2023. Sa taho nga gipagawas sa Committee on Registration sa NRP 2023, Kathrina Buletin, general secretariat anaa na sa 2,076 ka mga kaparian ang nakaparehistro ug kutob lang sila modawat sa 2,200 kay mao ra ang setting capacity sa venue.
Sumala pa ni Buletin, 352 ka mga pari ang nagprehistro gikan sa Sugbo ug niabot na usab ngadto sa 30 ka arsobispo ug Obispo ang konpirmado nga moapil sa tulo ka adlaw nga tigum.
Matud pa ni Fe Mantuhac-Barino, Over-all Chairman sa NRP Working Committee, anaa na sila karon sa 85 porsyento sa pagpangandam uban sa tanan nga mga working committee nga kadaghanan mga layko.
Sumala pa ni Barino, gihimo na nila karon ang tanan hangtud sa umaabot nga kalihukan sama sa nagkadaiyang pagpangandam ug mga pag-ampo apan inig abot na unya sa kalihukan ilaha na kining itugyan tanan ngadto sa Ginoo.
Si Archbishop Jose Palma nipadayag sa iyang pasalamat sa paningkamot sa mga working committee sa pagpangandam sa National Retreat for Priest 2023. (BANAT NEWS)