Sud-gawas sa prisohan, nakuhaan og P7 milyong shabu

MANILA, Philippines — Nasakmit sa kapolisan  sa Presinto 4  sa Mandaue City Police Office (MCPO)   ang kapin sa usa ka kilo nga shabu nga nagkantidad og P7,242,000.00 gikan sa ex-convict nga napriso na kaniadto tungod gihapon sa ilegal nga drugas.

Ang operasyon gihimo diha sa Purok  Bangan, dalan M.L. Quezon sa   Barangay  Cabanclan sa maong siyudad alas- 2 sa Sabado  sa kaadlawon nga niresulta sa pagkasikop sa 52-anyos nga molupyo  sa siyudad sa Sugbo.

Gipangulohan ang operasyon sa hepe sa Presinto 4 nga si Police Major  Mikhail Mallorca nga niresulta sab sa pagkasakmit sa 16 ka medium size nga pakete, pito ka dagkong putos nga dunay sud nga gidudahang shabu nga motimbang  tanan og 1.65 kilo.

Dugang nakuha gikan sa suspek ang P2,300 nga kuwarta nga gituohang halin sa drugas ug ang P2,000 nga marked money.

Ang suspetsado gikatahong miangkon nga gisugo siya sa paghatod sa maong shabu  sa dakbayan sa Mandaue bugti  sa bayad .

Ang maong dinakpan nabalhog na sa bilanggoan niadtong tuig 2007 hangtod 2017 tungod gihapon sa kaso sa ilegal nga drugas. Apan nakagawas siya niadtong 2017, nadakpan kini pagusab niadtong 2019 apan nakagawas kini niadtong miaging Marso karong tuiga.(BANAT NEWS)