CEBU, Philippines — Gipahigayon na sa niaging adlaw ang groundbreaking sa tukoron nga fire station sa Dakbayan sa Talisay.
Ang maong kalihokan gipahigayon sa mga kadagkoan sa Bureau of Fire Protection (BFP)-7 uban ni Mayor Gerald Anthony “Samsam” Gullas, Jr.
Si Chief Inspector Alvin Torion, fire marshal sa Dakbayan sa Talisay nagkanayon nga dako kini og kalamboan dili lang sa ilang buhatan lakip na sa kinatibuk-ang Talisaynon ug mga silingang lugar.
Ug makatabang usab kini aron mapalambo pa nila ang ilang serbisyo.
Matud ni Torion nga dili lang Talisaynon ang makabenepisyo niini tungod kay sa iyang pagdumala sa siyudad bisan og dili sa ilang area of responsibility ang sunog motawag kaniya ang mayor ug magpangutana sa pwedeng tabang nga ilang mapadala sa lugar nga nasunogan.
“Ingon ana ang serbisyo sa mayor nga mo-extend pa sa ubang lugar”, ni Torion pa. Sa iyang bahin, si Gullas nagkanayon nga ilang mahimo mao ang paghatag og suporta diin makabenepisyo niini ang mga Talisaynon.
Ang yuta nga tukoran sa edipisyo iyaha sa siyudad ug gipagamit kini sa BFP diin ang pundo sa proyekto gikan sa BFP. Ang maong luna nga tukoran sa bag-ong fire station nahimutang kini diha sa city hall compound. — BDB (BANATNEWS)