CEBU, Philippines — Andam na nga modawat og reklamo sa mga Oponganon ang gimugna nga "Kontra Bigay Desk" sa Lapu-Lapu City Police Office (LCPO) isip pagsanong sa hangyo sa buhatan sa Commission on Election (Comelec) sa siyudad sa Lapu-Lapu sa pagdawat og reklamo nga naglambigit sa vote buying.
Kini ilabi na sa nagsingabot nga Barangay ug Sangguniang Kabataan Election.
Suma pa ni Police Lieutenant Colonel Christian Torres, hepe sa City Investigation Detection and Management Bureau (CIDMU) ug Spokesperson sa LCPO miingon nga ang Kontra Bigay Desk ilang giandam aron maoy dangpanan sa mga reklamo sa vote buying.
Hinuon si Torres miingon nga hangtod niining mga panahona wala pa sila makadawat og bisan usa ka reklamo sa vote buying sa umaabot nga BSKE.
Ang gidistino nga usa ka imbestigdor sa CIDMU maoy modawat sa reklamo ug mao usab ang mohan-ay o moandam sa iduso nga reklamo ngadto sa Comelec.
Gitataw niya nga ang moduso og reklamo kinahanglan nga andamon usab ang ilang mga ebedensiya ug ang ilang mga saksi.
Gipasabot ni Torres nga ang ilang buhatan igo lamang nga moandam sa kaso ug ilang iduso ngadto sa Comelec sa siyudad nga mao na ang mopasaka niini ngadto sa ilang ulohang buhatan. (BANAT NEWS)