CEBU, Philippines — Moabot sa 878,000 ka mga tinun-an sa Probinsya sa Sugbo ang gipaabot nga makabenepisyo sa ipahigayon nga feeding program sa Kapitolyo lukop probinsya.
Ang maong mga tinun-an gikan sa kindergarten ngadto sa grade 12. Ang libre nga lugaw o feeding sa mga tinun-an ipahigayon sa Dep-Ed Cebu Province Division.
Gusto hinoon sa gobernador nga iapil ang city divisions sa Mandaue City, Talisay, Carcar, Toledo, Naga, Danao, ug Bogo sa maong inisyatiba.
Sumala sa Capitol Information Office nga apil niini ang tanang mga tinun-an, malnourished man o dili. Gusto ni Garcia nga ang feeding program ipahigayon ka lima sa usa ka semana gikan Lunes hangtud Biyernes hangtud matapos ang school year sa DepEd.
Sa nasabotan sa mga stakeholders uban sa gobernador niadtong Oktubre 9, ang National Food Authority maoy mosupply sa bugas, samtang ang mga opisyal sa Parent Teacher Association sa matag skwelahan maoy gitahasan sa pag-andam ug luto sa pagkaon nga gawas sa lugaw apilan pud og manok ug mga utanon aron mas himsog ang mga bata.
Ang Kapitolyo maoy mopalit og pipila ka butang sama sa mga utensil.
Sunod bulan gipaabot nga sugdan ang feeding program kon diin ang pundo niini mag gikan sa Provincial School Board. (BANAT NEWS)