Dunay mga pamilyang wa mobakwit
![Dunay mga pamilyang wa mobakwit](https://media.philstar.com/photos/2023/10/10/1_2023-10-10_23-43-49.jpg)
CEBU, Philippines — Bisan sa padayon nga paglihok sa yuta sa Purok Riverside, Barangay Cantao-an, Siyudad sa Naga aduna pa gihapoy mga pamilya nga nagdumili sa pagbakwit sumala pa ni Barangay Konsehal Silvestre Abasolo.
Matud pa niya nga 13 ka pamilya ang ilang gihangyo nga mobakwit na ngadto sa karaan nila nga tunghaan apan nagmagahi pa gihapon sila.
Hinuon gipapirma nalang sila og waiver sa pagmatuod nga ang taga barangay nihimo na sa paghangyo kanila nga mobakwit aron luwas sila kung unsa man ang mahitabo.
Sa datos sa petsa 10 sa Oktubre, 10 ka pamilya ang naa karon sa evacuation area samtang 29 nitipon lang una sa ilang paryenti o nangabang og laing panimay.
Si Silveria Abarquez sa City Social Welfare and Services sa Naga nitataw nga kumpleto sa ayuda ang namakwit sama sa bugas, sud-an, tubig ug kuryenti.
Mohatag sab sila og mga tambal kung pananglit adunay mga sakit.
Sigon pa ni Santos Gentapa, usa sa mga nibakwit nga iya lang gilibre ang iyang pamilya kay siya nabalaka sab sa dili maayo nga panghitabo.
Natagam na siya sa nahitabo sa Sindulan nga ubay-ubay ang patay gumikan sa landslide.
Apan si Gina Tapinid, usa sa mga residente nga wala mibakwit miingon nga kahibawo sila sa paglihok sa yuta apan dili nila mabiyaan ang ilang binuhing hayop ug mga kabtangan.
Si Kapitan Cristina Ababa nagkanayon nga gipatawag na siya sa abogado sa kontraktor uban sa taga Department of Public Works and Highways (DPWH). Sa pagsuwat ning balita, nipasalig ang kontraktor nga mohatag og partial nga tag P30 mil sa 52 ka pamilya.
Samtang si Engr. Arthur Villamor, city administrator sa siyudad nalipay nga adunay pasalig ang kontraktor nga mohatag og ayuda.
“Ang among prayoridad mao ang kaluwasan sa katawhan mao na nga among siguruon nga mahatag unsa ang angay nga mahatag aron mobiya na ang mga tawo sa lugar,” matud pa ni Villamor. (BANAT NEWS)
- Latest