10 ka pamilyang nagpuyo sa Pari-an Creek ipabalhin

CEBU, Philippines — Ipahigayon sa Task Force Gubat sa Baha karong adlaw nga Lunes ang coordination meeting may kalabutan sa gikatakda nga pagpabalhin sa 10 ka mga pamilya gikan sa ilang gipuy-an nga sapa sa tumoy nga bahin sa Estero de Pari-an dapit sa pier area nga sakop sa Barangay San Roque ning Dakbayan sa Sugbo.

Nasuta sa Task Force Gubat sa Baha atol sa ilang tigum nga napulo lang ka pamilya ang palalinon ug dili 12 ka pamilya nga maoy unang gikataho.

Matud pa ni Joseph Ylaya sa Division of the Welfare for the Urban Poor kon DWUP atol sa tigum nila sa TFGSB aduna silay nasuta nga may magtiayon nga nahatagan og duha ka slots kay parehas kining nagpa interview.

Karong Lunes motambong sa maong coordination meeting ang mga representante gikan sa buhatan sa  DWUP, PROBE, Kapitan sa Barangay San Roque, City Legal Office,  DSWS, CCRRMO, DEPW, Police Stn 3, DGS,  DPS, DEP-ED Cebu City  og Schools Division Superintendent.

Ang maong mga apektado nga pamilya hatagan og luna ngadto sa may Nangkaville Barangay Quiot Pardo. (BANAT NEWS)