CEBU, Philippines — Suspetsado sa pagpamusil apil ang upat ka mga kauban niini ang nadakpan sa kapolisan diha sa Barangay Casili sa Siyudad sa Mandaue atol sa hot pursuit operation nga gilusad gikan sa maong siyudad hangtud sa Siyudad sa Danao.
Ang mga dinakpan maoy suspetsado sa pagpusil sa biktima nga 16- anyos sa Lower Casili, Siyudad sa Mandaue alas-2 pasado sa miaging Martes sa kaadlawon.
Ang hepe sa kapolisan sa Presinto 6 sa MCPO nga si Police Major Manuel Cabanlit miingon nga gisuyaan sa mga suspetsado ang biktima nga giingong miyembro sab og gang. Gikaingon nga miyembro og gang ang mga dinakpan.
Matud pa naglingkod lang sa aseras kauban sa duha ka mga higala ang biktima sa dihang naagi ang mga suspek nga nag-angkasay sa motorsiklo ug kalit kini nga gialirungan ug gisagpa-sagpa. Wala pa gyud matagbaw, gipusil kini sa tiyan.
Daling nangikyas ang mga suspek luwan sa motorsiklo ug wa na maabti sa mga polis. Gidala nila ang biktima ngadto sa Mandaue City Hospital.
Nasakmit sa kapolisan atol sa pagkasikop sa mga suspetsado ang usa ka kalibre .357 revolver nga adunay lima ka mga bala ug usa ka kalibre .38 nga adunay tulo ka mga bala.
Gisusi na sa kapolisan kun duna pay laing krimen nga gihimo kaniadto ang mga dinakpan gamit ang maong mga armas. Gipangita pa usab ang duha ka mga kaubanan sa grupo. Kasong frustrated murder ang ipasaka batok sa mga dinakpan.
“Among gitan-aw ni nga among pagtuo nga involvement aning mga suspetsado dili lang diri sa Mandaue, posible nga involved pa ni sa mga shooting incidents sa Danao City, Consolacion ug possibly sa Cebu City,” matud pang Police Lt. Colonel Rodulf Oriol, ang Public Information Officer sa Mandaue City Police Office bahin sa panagtinabangay sa PS6-MCPO,Danao City, Consolacion, Compostela police stations pagpangita sa mga suspek. — Rowena Capistrano (BANAT NEWS)