CEBU, Philippines — Miabot sa 283 ang gipangsita sa kapolisan sa Dakbayan sa Talisay sa pagpahigayon sa Simultaneous Anti-Criminality Law Enforcement Operation (SACLEO) niadtong weekend.
Nasayran ang maong operasyon gipatuman aron pakigbatokan ang nagkalain-laing krimen.
Si Police Lt. Col. Wayne Magbanua, hepe sa kapolisan sa Talisay maoy nangulo sa operasyon batok sa nagkalain-laing kalapasan ug ordinansa sa siyudad.
Gilibot sa mga operatiba ang nagkadaiyang barangay hangtud nga nakasikop og duha ka indibidwal nga may kalapasan sa ilegal nga drugas, usa sa ilegal nga sugal, usa sa Oplan Katok, ug 179 ang nakalapas sa lagda sa karsada ug 100 sa nagkalain-laing kalapasan sa ordinansa.
Ang otoridad nakasakmit og drugas nga nitimbang og 10.75 gramos nga adunay gibana-bana nga balor nga P73,100 ka pesos.
Kasagaran sa mga nadakpan gibuhian ra human nakamulta samtang ang uban napasakaan og kaso ug natanggong pa sa bilangguan.
Si Magbanua nagkanayon nga magpadayon ra gihapon ang ilang mga operasyon aron ang ilegalista mapuyo diha sa bilangguan. (BANAT NEWS)