Iro nga gipasanginlang nipatay sa amo daghang gusto nga mosagop

CEBU, Philippines — Daghan ang nipakita og interest nga mosagop ni “Spike”, ang iro nga gipasanginlan nga niunay sa pagpatay sa iyang amo.

Si Talisay City Mayor Gerald Anthony “Samsam” Gullas, Jr. nibutyag nga daghan na siya og nadawat nga mensahe nga nipadayag sa ilang interest nga mosagop ni Spike.

Sayo pa, si George Mayol, 63-anyos ang napalgang patay diha sa iyang kwarto sa Sitio Molila, Barangay Lawaan 1, Siyudad sa Talisay niadtong niaging semana.

Ug si Spike ang gipasanginlan nga nipatay kang Mayol gumikan kay giingong niadtong buwan sa Hulyo tuig 2022 gipaak na usab si Mayol sa maong iro apan adunay nakatabang kang Mayol niadtong higayona.

Matud ni Gullas nga gimandoan na niya ang kapolisan sa pagsubay sa kamatayon ni Mayol.

Niining ulahi lang, ang kapolisan niluwat og pamahayag sa pagpaubos sa autopsy sa patay’ng lawas ni Mayol aron masuta ang hinungdan sa kamatayon niini apan gipa-cremate na kini sa iyang sa mga paryente.

Samtang si Spike anaa sa kustodiyo sa City Veterinarian Office diin obserbahan kini sulodd sa duha ka semana. Matud ni Gullas nga kong mahuman na ang duha ka semana nga pag-obserbar ug mapamatud-an nga wala kini sinyales nga adunay rabies mahimo na nga ipasagop ni Spike.

Nalipay ang mayor nga daghan ang nipadayag nga mosagop kang Spike apan ang City Veterinarian Office mopadayon pa sa pag-obserbar sa batasan ni Spike kong luwas ra ba gyud nga maadto kini sa bag-ong amo.

Dugang ni Gullas nga kong ugaling tinuod ang nigawas nga taho nga nakasinati og dili maayo nga pagtratar si Spike sa iyang amo mas taas pa nga panahon ang ihatag sa pag-obserbar sa iro aron siya maka-adjust sa dili pa masagop og bag-ong amo. — /BDB (BANAT NEWS)