CEBU, Philippines — Sirhan ang usa ka lane sa Cebu South Coastal Road (CSCR) habig sa Barangay San Isidro hangtud na sa Barangay Lawaan 1, Dakbayan sa Talisay karong adlawa (Domingo), Oktobre 1,2023.
Kini alang sa pagahimuon nga Mayor’s Cup Bike Race Tournament nga sugdan sa alas 5 sa kaadlawon hangtud sa alas 12 sa udto.
Tipik kini sa mga kalingawan alang sa nagsingabot nga kapistahan sa Syudad sa sunod buwan.
Si Jonathan Tumulak, pangu sa City of Talisay-Traffic Operation Development Authority (CT-TODA) nipahibawo nga ang northbound lane himuon nila kini nga two-way lane.
Samtang ang pikas nga lane ang pahigayonan sa lumba sa bisekleta. Nagkanayon si Tumulak nga Domingo man tuod kini pero mas maayo nga planohon daan sa motorista ang ilang biyahe.
Kini aron di matanggong ug dugay kung pananglit daghan gyud ang sakyanan nga magdungan sa pagbiyahe nianang mga orasa.