Kanhi Fil-Am boxer gisentensiyahan

CEBU, Philippines — Gisentensiyahng mabilanggo og duha ka buwan tungod sa pagpangawat ang kanhi boksidor nga si Isagani Pumar human kini gidakop kay nangawat og bisekleta nga nagkantidad og kapin P6mil diha sa Sitio Lawis, Barangay Pasil, Siyudad sa Sugbo.

Wala kaayo mabaniog ang pangalan ni Pumar dinhi sa Pilipinas tungod kay didto kini nagbase sa Amerika sa panahon nga siya aktibo pa sa professional boxing niadtong dekada 90.

Apan matud pa ni Police Major Francis Talosig, hepe sa Sawang Calero Police Station 6, ang 49-anyos nga si Pumar gibansagan og “The Little Guns” sa natad sa boksing nakapangasawa og Filipina nga American citizen ug tungod sa ilang pagminyo nahimo sab siyang US citizen.

Apan nahugno ang iyang karera sa boxing kay naapil kini og gang sa Estados Unidos nga nalambigit sa carnapping ug pagpangawat hantod nga napasakaan sab siya og kaso didto ug gipa-deport balik sa Pilipinas.

Pagka-kaadlawon sa Septiyembre 2 ning tuiga giingong gikawat ni Pumar ang nakakandado nga BMX bike  nga iyang gikarga sa iyang trisikad.

Nidangop sa Police Station 6 ang tagiya nga si Rodrigo Ompad nga taga Barangay Pasil ra usab.  Ug sa pagsubay sa sa kapulisan sa CCTV cameras sa lugar nakita didto ang gibuhat ni Pumar.

Tuod man giadto sa kapolisan ang gipuy-an sa boksidor ug didto nabawi ang bisekleta hinungdan sa pagdakop kaniya.

Dul-an usa ka buwan siyang natingkagol sa maong police station hangtud  nigawas ang hukom kagahapon nga nagmando pagbilanggo kaniya sa city jail og duha ka buwan.

“Ibaligya niya kay matod pa niya wala na daw siya’y kwarta. So, nangita siya og kwarta, gikawat niya ang bike kay ibaligya niya,” matud ni Talosig.

Gipadayag ni Pumar ang iyang pagbasol sa gidangatan sa iyang kinabuhi karon nga naguba tungod sa bisyo. Matud pa hubog siya adtong tungora sa dihang iyang gihimo ang krimen. Si Pumar nakigsangka sa ibabaw sa ring kaniadto ubos sa super featherweight division.

Dugang pa ni Pumar, dako iyang pagmahay pero wala uwahi na ug iyaha nalang kining atubangon ang resulta niini.

Giangkon ni Pumar, nga niagi usab siya ug bisyo ug katapusan niyang gamit sa illegal nga drugas niadtong nakalabay nga Enero.

Si Pumar misaad nga kun makagawas na siya, paningkamotan gyud niyang magbag-o ug nangayo sab siya og pasaylo sa iyang asawa ug anak nga toa sa Amerika ingon man sa iyang mga kabanay.

Plano niyang mamahimong trainer sa boksing o mangita og desenteng trabaho.

Si Pumar adunay rekord nga 31-13-3 win-loss-draw sa iyang 47 ka away didto sa Amerika.

Usa sa mga kulbahinam nga sangka sa iyang karera kadto pag-ilog niya sa state junior lightweight championship belt ni Hector Monjardin didto s Warner Center Marriott sa California niadtong Hulyo 1995.

Si Monjardin nanganti nga tapuson niya si Pumar sud sa upat ka rounds, apan napakyas siya. Sa ikalima nga round, gidabodabohan siya ni Pumar hangtud nga siya miisa sa puting bandila.

Human sa pagdabo-dabo, usa ka makabungog nga sukmag sa kilid gikan sa tuong kumo nga gisundan og left hook sa nagkadugo nga nawong ang nakaingon sa pag-isa sa mga kamot ni Monjardin timaan nga di na siya mopadayon.

Ang maong dinakpan kasamtangan kining nagpuyo sa Pahina Central ning Dakbayan sa Sugbo sa dihang wala pa kini madakpi.— Rowena D. Capistrano, IBM (BANATNEWS)