CEBU, Philippines — Nagbakho nga nagpakitabang sa mga silingan ang usa ka ginang human siya gikatahong gisulod og unom ka wa ilhing mga lakaki diha sa iyang pinuy-anan sa Barangay Tabunok, Dakbayan sa Talisay kagahapon sa kaadlawon.
Ang biktima mao si Hazel Gacayan, 52, nagpuyo sa nahisgutang lugar.
Sa interbyu sa GMA Super Radyo ni Gacayan nga nakamata siya aron mangihi apan nakabantay nga adunay kasikas sa gawas.
Matud niya mipugos sa pagsulod ang mga lalaki nga nagsul-ob og bonnet nga natabonan ilang dagway ug giingong midemanda kaniya kun asa ang “B.”
Iyang gihimakak nga siya tiggamitan og ilegal nga drugas apan ang iyang anak nga babaye naa niining bisyoha.
Matud pa niya gisukmag siya sa dughan, ulo ug gibunlot iyang buhok sa maong mga lalaki ug pagkahuman gisulod iyang ulo og platik bag.
Si Gacayan nitataw nga wala gyud siya makaila sa mga tawo nga misulod sa ilaha ug mikulata kaniya.
Si Police Lt. Col. Wayne Magbanua, hepe sa kapolisan sa Talisay miingon wala moduol kanila ang ginang. Giawhag niya sila nga moduol kanila aron matabangan kung unsa nga klase nga tabang ang ilang mahatag.— IBM (BANATNEWS)