CEBU, Philippines — Mohatag og tabang pinansyal ang Probinsya sa Sugbo ngadro sa 16 ka mga Sugboanon nga nabiktima sa human trafficking didto sa Sulu Province sa Mindanao. Gisaad ni Gobernador Gwendolyn Garcia nga mohatag ang Kapitolyo og tag P10,000 ngadto sa mga biktima nga na-rescue sa otoridad didto sa nahisgotang lalawigan.
Gisaad kini ni Garcia ngadto sa anchor nga si Ben Tulfo usa ka host usa ka TV program atol sa pagbisita niini ngadto sa gobernador.
Sumala sa Capitol Information Office ang maong mga Sugboanon apil sa 123 ka mga biktima sa human trafficking nga na-rescue sa Philippine Navy sa Tubalubac Island, Pangutaran sa Sulu.
Nimando si Garcia ngadto sq Provincial Social Welfare and Development Office nga mohatag sa gikinahanglan nga tabang sa mga biktima nga nakabalik na diri sa Sugbo.
Sumala pa sa taho, ang mga biktima gilangkoban sa manag pamilya ug aduna pay mga bata nga gipugos pagpatrabaho sa usa sa mga isla didto sa Sulu.
Ang mga biktima kasagaran gikan sa Sugbo ug sa Bohol gisaaran sa ilang recruiters nga moadto sa Sulu aron makapangita og trabaho sa Malaysia ug Indonesia pinaagi sa ‘backdoor’ sa Pilipinas padulong sa silingang mga nasud. — IBM (BANATNEWS)