Bajo de Masinloc gibabagan sa mga chinese

CEBU, Philippines — Gibabagan sa Chinese Coast Guard og floating barrier ang habagatang bahin sa Bajo de Masinloc o Scarborough Shoal o Panatag Shoal nga tradisyonal nga panagatan sa mga Pilipino diha sa Zambales sumala pa sa Philippine Coast Guard.

Mao kini ang hinungdan nga dili makasulod sa bahora ang mga mananagat nga Pilipino aron unta makapanagat sumala pa sa Philippine Coast Guard kagahapon adlaw nga Domingo.

Ang PCG ug Bureau of Fisheries and Aquatic Resources personnel  sakay sa BRP Datu Bankaw maoy nakadiskubre sa 300-meter floating barrier  atol sa ilang pagpahigayon og maritime patrol mission sa Bajo de Masinloc niadtong adlaw nga Biyernes.

“Three Chinese Coast Guard’s rigid hull inflatable boats and Chinese maritime militia’s service boat installed the floating barrier upon arrival of the BFAR vessel in the vicinity of the shoal,” matud pang Commodore Jay Tarriela, ang tigpamaba sa PCG  sa West Philippine Sea.

Matud pang Tarriela ang mga mananagat nga Pilipino maoy nitug-an kanila bahin niini. Matud pa pirme na kinining buhaton sa CCG  basta makakita silang dunay daghang mga Pilipino nga mananagat sa lugar.

Atol sa maong pagkadiskubre, dunay 50 ka mga fishing boats sa Pilipinas diha sa maong dapit nga nanagat.  Ang BFAR nisuporta sa mga mananagat didto sa paghatag kanila og supply nga pagkaon ug gasolina op petrolyo  aron makapadayon sa ilang pagpangisda.

Sa briefing nga gipagawas sa CNN Philippines,  si Tarriela miingon nga dili makasulod sa Bajo de Masinloc ang mga mananagat nga Filipino apan pwede gihapon silang makapangisda sa palibot niini.

Kahinumdoman nga ang grupong PAMALAKAYA mipahibalo nga ang nimenus og 70 porsiyento ang kuhang isda sa mga Pilipino karon gikan sa WPS sukad nga naghar-hari didto ang China nga nagsugod og grabe sa panahon sa administrasyong Duterte.

Si kanhi presidente Rodrigo Duterte mipadaplin sa 2016 Arbitral Ruling nga nag-ingong walay katungod ang China sa Bajo de Masinloc kay iya kini sa Pilipinas, kini human ang administrasyon ni kanhi presidente Benigno “Noynoy” Aquino mipasaka og kaso batok sa China didto sa The Hague ug midaog ang Pilipinas niadto.

Apan si Duterte wala mangusog pagpatuman sa ruling tungod kay mas gipili niyang makigsuod ngadto sa China.

Si Tarriela mipahibalo sab nga ang Chinese Coast Guard ships 3065, 3066, 3105, ug 3301 nagbanos-banos og radyo sa barko sa BFAR aron kini abugon palayo, tataw nga kini kalapasan sa international ug lokal nga balaod.

Apan sa dihang nakamatikod ang mga Chinese nga dunay media sa barko sa BFAR nagiyahay sila og biya ug nipalayo, matud pang Tarriela.

Kahinumdoman nga ang PCG nipagawas og video niadtong nakalabay nga semana nga nagpakita sa ilawom sa kadagatan sa Rozul (Iroquois) Reef ug Escoda (Sabina) Shoal  nga mura na og disyerto ilawom sa dagat, walay makitang isda ug nabungkag na ang gasang o coral reefs tungod sa paglarot sa mga Chinese.

Apan ang China kusganong mihimakak nga sila maoy nangguba sa mga coral reef didto ug miawhag sa Pilipinas nga hunongon na kining “drama”. Gisumbalik sab nila og pasangil nga ang nasangad nga BRP Sierra Madre nagsige og labay og hugaw sa dagat.

“The destruction of corals goes far beyond drama. It is a violent act and a serious crime against humanity,” matud pang Tarriela kinsa misumbalik sab sa China sa pag-ingon: “Stop making allegations that BRP Sierra Madre is polluting the water, but blame it to your numerous Chinese maritime militia swarming the Philippines' exclusive economic zone,” dugang pa sa opisyal.—Gikan sa Philstar.com/IBM (BANAT NEWS)