Magsuon nga nanagit og motorsiklo sikop

CEBU, Philippines — Duha ka magsuon nga suspetsado sa pagpanagit og motorsiklo ang nadakpan sa kapolisan ala 1:00 pasado sa hapon niadtong Sabado diha sa Sitio Tabaylawom, Barangay San Vicente sa Lungsod sa Liloan.

Si Police Major Eric Gingoyon, hepe  sa Liloan Police Station niila  sa suspetsado nga si  Richard ug Rey Maglasang, 18 ug 20-anyos, pulos molupyo sa Tabaylawom, Barangay San Vicente sa maong lungsod.

Matud ni Gingoyon nga ang motorsiklo nga giingong gi-carnap sa mga suspetsado ang giila usab sa tag-iya  nga  si Daniel  Mahinay,  hingkod ang panuigon, nagpuyo sa  Sitio Cabangcalan, Barangay  Jubay sa mao gihapon nga lungsod.

Nunot  niini, Giawhag ni Gingoyon ang mga molupyo  sa Lungsod  sa Liloan  nga biktima sa pagpang-carnap  sa ilang motorsiklo sa pagbisita diha sa ilang buhatan alang sa pag-ila  sa duha nila ka mga dinakpan  alang sa pagdugang sa kaso nga ilang ipasaka  batok sa magsuon. (/BDB) (BANAT NEWS)