CEBU, Philippines — Nadakpan sa kapolisan sa Liloan Police Station ang lima ka tawo sa usa ka adlaw nilang Simultaneous Anti-Criminality Law Enforcement Operation (SACLEO) niadtong Septiyembre 22, 2023.
Ang maong lima ka nasikop nakuhaan og mga pinakete nga shabu.
Niabot ngadto sa lima ka gramo nga shabu ang nasakmit nga nagkantidad tanan ngadto sa P38,626.00 atol sa managlahing buy-bust operation nga gipahigayon sa kapolisan lakip niini diha sa Barangay Catarman ug Poblacion, Lungsod sa Liloan.
Nadakpan usab sa mga polis ang wanted person kinsa nag-atubang og kasong murder.
Sa laing operasyon nga gipahigayon sa kapolisan, walo ka armas lakip niini ang .9mm pistol ug usa ka kalibre .38 ang nasakmit sa mga polis ug adunay ubang armas ang gisurender ngadto sa ilang buhatan.
Sa ilegal swertres usa ang nadakpan sa mga polis samtang sa Oplan Sita naisyuhan og citation ticket ang 23 ka drayber sa nagkadaiyang kalapasan sa trapiko nga ilang nahimo ug nikabat ngadto sa P24,000 ang multa nga natigom. (/BDB) (BANAT NEWS)