CEBU, Philippines — Permanente ng gisirad-an ang “bagsakan” diha sa South Road Properties sa Cebu City sugod niadtong adlaw nga Miyerkules ug ang mga fish vendors anha na tanan sa Barangay Suba.
Si OIC market administrator Robert Barquilla miingon nga wala ray nasugatang problema sa pagbalhin sa mga vendors. Tungod niini, wala nay tugotang makapaninda sa SRP.
“Wala na wala..Di na pwede..Naghinay-hinay na silag pamalhin sa Pasil,” matud pang Barquilla.
Dunay 20 ka mga fish vendors nga nag-operate sa SRP apan wala pay bisan usa nila nga nipwesto sa bag-ong fish market sa Barangay Suba.
Giangkon ni Barquilla nga duna pay wala mangahuman nga bahin sa maong bag-ong fish market apan gipaspasan na ang pagtrabaho niini aron mahuman ug makompleto ang pasilidad.
Sa pagkakaron, ang pipila sa mga stalls wala pay linya sa kuryente apan gipaspasan na sa Visayan Electric ang pag-instalar sa mga linya sa kuryente makasuga na ang mga stalls.
Generator sets lang ang gigamit karon sa mga bendors sumala pang Barquilla. Gawas sa linya sa kuryente, dunay mga vendors nga kinahanglan pang tarungon human nangaguba sa bagyong Odette.
“Naa pay mga repair-ronon pero ang facility itself magamit naman,” matud pang Barquilla.
Usa sa nakita sab nga kinahanglang palambuon mao ang agianan padung sa fish market kay mas gamay kini kun itandi sa Bagsakan sa SRP.
“Tua na mag deliver ang mga truck…Medyo gamay rang dan didto pero makaagi raman sila…Na clear na pud natong mga dan para mas hapsay ang tanan..Niadjust ra pud sila sa sitwasyon,” dugang pang Barquilla.
Gipahibalo sab ni Barquilla nga dunay plano si Mayor Michael Rama nga palapdan ang maong merkado.(BANAT NEWS)