CEBU, Philippines — Padayon nga gihingusgan sa Criminal Investigation and Detection Group(CIDG)-7 ang ilang flagship project nga Oplan Pagtugis o kining pagdakop sa mga pinangita sa balaod.
Sa miaging adlaw duha ka warrant of arrest ang gi-serve sa CIDG Cebu City Field Unit batok sa mga suspetsado nga naa sa Top Ten Most Wanted Person.
Unang nadakpan si Jeferson Tapic Sistoso, 44 anyos, residente sa Sitio Cadulang II, Barangay Marigondon sa Lapu-Lapu City.
Gidakop kini sa restaurant nga iyang gitrabaho isip usa ka chef diha sa Barangay Pusok, Lapu-Lapu City.
Si Sistoso giingong ika-walo sa Regional Level ug ika-pito sa Provincial Level dunay warrant of arrest sa kasong sexual assault in relation to section 5 sa Republic Act 7610.
Ang warrant of arrest giisyu nilang Judge Christine Muga-Abad, Presiding Judge sa 7th Regional Trial Court Branch 70, Lapu-Lapu City nga gipagawas Septiyembre 7, 2023 ug wala’y piyansa nga girekomendar.
Nadakpan sab si Anito Jayme Quimbo alyas Anito Jayme Quimno Jr., alyas GVD, 44 anyos ug Top Ten Most Wanted Person nga ika-walo sab sa Regional Level ug ika-tulo sa Provincial Level.
Si Quimbo nga residente sa Sitio Buyong, Barangay Maribago, siyudad sa Lapu-Lapu nadakpan diha sa Thirsty Compound, Barangay Banilad, siyudad sa Sugbo.
Duna kini warrant of arrest gumikan sa kasong incestuous rape gikan sa sala ni Rosario Evelyn Roldan Sistosa-Singco, Presiding Judge sa 7th Regional Trial Court Branch 71, Lapu-Lapu City nga gi-isyu niadtong Septiyembre 6, 2023 ug wala’y piyansa nga girekomendar. Giingong nagtago-tago sa Danao City, Lapu-Lapu City ug Cebu City ang dinakpan.— IBM (BANATNEWS)