CEBU, Philippines — Patay’ng lawas sa na-missing nga mananagat napalgan sa miaging buntag sa baybayon sa Barangay Catarman, Lungsod sa Liloan.
Sa pasiunang imbestigasyon nila ni Police Major Eric Gingoyon, hepe sa Liloan Police Station, ilang gituohan nga nalumos si Nelson Cuyos, 61.
Ang kauban niini nga managat nga si Marlon Labajo maoy nanawag sa kapolisan pasado alas 7 sa gabii niadtong Biyernes human nga wala na motunga gikan sa pagsawom si Cuyos.
Ang duha nanagat diha sa kadagatan sa Sitio Mahogany sa Barangay Catarman sa maong lungsod.
Gitug-an ni Labajo nga sa sinugdanan, iyaha kining gipangita apan sa dihang nikilom-kilom na, nakahukom kini nga magpatabang sa mga otoridad sa pagpangita sa kauban.
Si Police Senior Master Sergeant Jason Gayo, desk officer sa Liloan Police Station nga naabtan sila og alas 10 pasado sa gabii sa pagpangita apan napakyas sila sa pagkaplag niini.
Nunot niini si Gayo miingon nga ilang gitambagan ang mga kabanay sa pagpaubos sa autopsy sa patay’ng lawas alang sa pagsuta sa hinungdan sa kamatayon niini. — /IBM (BANAT NEWS)