Pasigarbo sa Sugbu gidagsa sa mga tawo

CEBU, Philippines — Bagang duot sa katawhan ang nisaksi sa Pasigarbo sa Sugbo nga gitambongan sa mga opisyal sa kaulohan ug lokal aron makasaksi sa kasadya sa okasyon.

Apil sa mga nitambong aron motan-aw mao si First Lady Liza Araneta-Marcos, Vice President Sara Duterte-Carpio, Department of Tourism Secretary Christina Garcia-Frasco, Governor Gwendolyn Garcia, mga senador, mga provincial board members ug mga mayor ug opisyales sa Sugbo.

Alas-2 sa hapon gisugdan ang parada nga giapilan sa mga contingents gikan sa 50 ka lungsod ug mga components cities sa probinsya.

Nagkadaiyang gimik ug presentasyon ang gipakita sa mga contingents nga gikahugyawan sa katawhan ug giabibahan tungod sa kaanindot sa ilang mga sayaw nga makapalingaw kaayo.

Usa sa mga Festival Queens nga si Jhesidy Thea Alberca, sa Dakbayan sa Carcar, nitug-an nga bisan og bug-at ang iyang costume iya kini gikaya tungod sa dako nga suporta sa katawhan kanila, mga opisyal ug halad usab niya kini ngadto sa ilang Patrona Santa Catalina.

Gibutyag ni Alberca, daug ug pildi ilaha kini nga dawaton basta nakapakita lang sila sa ilang halad ug mapasigarbo ang Sugbo.

Usa ka Jennifer Rodrigo, lumad nga taga Lungsod sa Dalaguete ang tuyo nga niadto sa Dakbayan sa Carcar aron sa pagpakita sa ilang suporta ngadto sa ilang contingent.

Gitug-an ni Rodrigo, mas nagkadugay nagkanindot ang presentasyon sa Pasigarbo sa Sugbo.

Si Vice President Sara Duterte-Carpio  mapasalamaton sa imbitasyon nga makasaksi sa Pasigarbo sa Sugbo.

Ang Pasigarbo sa Sugbo maoy nagtak-op sa ika- 454th  Founding Anniversary sa Probinsya sa Sugbo. — /IBM (BANAT NEWS)