CEBU, Philippines — Bantayan sa Cebu City Police Office (CCPO) ang tanang tunghaan sa Siyudad sa Sugbo inig bukas sa klase karong Agosto 29,2023.
Matud ni Police Lt. Col. Janette Rafter, Deputy City Director for Operations ug tigpamaba sa Cebu City Police Office nga buntag o gabii man ang klase duna gyuy presensiya sa police sa mga tunghaan aron masiguro ang ilang kalawasan.
Magbutang sila og police assistance ilabi na sa unang semana sa pagbukas sa klase kay napanglantawan ang kahuot sa dagan sa trapiko kay daghan pang ginikanan ang mohatod sa ilang mga bata.
“Nakig-alayon pud kita sa barangay tanod together with different management sa aning mga eskwelahan para daghan ang magtrabaho kay atong nabantayan man gud ang usual problema gyud nato ani while we open classes is the congestion of traffic gyud, atong i-maximize atong kapolisan diha together with beat patrol, kanang atong central beat we have to realign them tagaan nato focus pud atong mga eskwelahan”, sigon ni Police Lt. Col. Rafter.
Masaligon ang kapolisan nga sa pagbalik sa klase dili motumaw ang problema sa gang sanglit duna man sila’y gihimong mga inisyatibo sama sa pakig-istorya sa mga fraternities ug sorrorities ug giapil gyud sila sa mga commuity services sa kapolisan.
Giawhag sa CCPO ang mga ginikanan kansang mga tinun-an mga gagmay pa nga butangan og name tag ang ilang mga bata nga dunay contact person ug kun mahimo dili hatagan og mahalon nga gamit aron maka focus sa pagtungha ug malikayan ang bati nga panghitabo.
“For the parents tabangan pud nato nga i-orient nato atong mga anak when it comes to security tips sa ilang paggawas sa atong mga panimalay”, dugang pa ni Lt. Col. Rafter. (BANAT NEWS)