CEBU, Philippines — Aron makatabang sa usa ka contingent sa pagdaog sa umaabot nga 2023 Pasigarbo sa Sugbo, ang mga Sugboanon mamahimong makabotar sa contingent pinaagi sa online. Ang organizers sa Pasigarbo mopatuman balik sa online voting diin 15% kini sa total score sa usa ka contingent sa ritual showdown.
Ang Kapitolyo nipagawas og guidelines sa mga online voters.
Human sa matag lima ka contingents, dunay ihatag nga special QR code ug link atol sa live coverage sa official Sugbo News account. Kinahanglan nga i- scan ang QR code o i- click ang link nga maoy modirekta ngadto sa voting portal" sumala sa Kapitolyo. Ang mga voters kinahanglan mopili sa ilang paborito nga duha ka contingents gikan sa grupo sa lima ka contingent aron dili ma imbalido ang ilang votes.
Ang nibotar sa winner sa Pasigarbo maoy kwalipikado nga makaapil sa raffle draw. Samtang ang mga LGUs sa cuatro distrito sa Probinsya sa Sugbo nakadawat na sab sa tag P2million nga subsidy gikan sa Kapitolyo alang sa ilang preparasyon sa umaabot nga festival.
Sila si Mayor Sun Shimura sa Daanbantayan, Mayor Joven Mondigo sa Medellin, Mayor Francis Salimbangon sa Tabogon, Mayor Raul Gerona saTabuelan, ug Mayor Alfonso Pestolante sa San Remigio maoy midawat sa maong subsidy nga gihatag ni Gobernador Gwendolyn Garcia.
Sa bahin sa Bogo, ang city administrator maoy nidawat sa maong subsidy. Moabot sa P12 million ang gihatag sa Kapitolyo nga subsidiya sa unom ka mga contingents gikan sa maong distrito.
Ang Pasigarbo sa Sugbo ipahigayon karong Agosto 27 sa dakbayan sa Carcar. —/MEL(BANAT NEWS)