Barko sa PCG gibombahag tubig

CEBU, Philippines — Gikondenar sa Philippine Coastguard ug sa Armed Forces of the Philippines ang pagatake sa Chinese Coastguard sa mga barko niini gamit ang water cannon didto sa West Philippine Sea niadtong adlaw nga Sabado.

“The Philippine Coast Guard strongly condemns the CCG’s dangerous maneuvers and illegal use of water cannons against the PCG vessels escorting the indigenous boats chartered by the Armed Forces of the Philippines,”  matud pa sa gipagawas nga pamahayag sa PCG.

Gikatahong nag-escort ang Coast Guard og gagmay nga lantsa nga nagdala og mga supply sama sa pagkaon, tubig, petrolyo ug uban pang batakang panginahanglan sa mga tropa sa Pilipinas nga nadestino sa BRP Sierra Madre sa Ayungin Shoal.

Gipasidan-an sa PCG nga CCG nga tahuron ang soberiniya ug katungod sa Pilipinas sa maong teritoryo. Ang maong dapit naa sa sulod sa 200 nautical miles exclusive economic zone ug continental shelf sa Pilipinas.

Gimandoan sab sila nga hunongon ang pagpangbabag sa kagawasan sa paglawig sa mga barko sa Pilipinas diha sa maong lugar ug silotan kadtong ilang mga sakop nga miatake sa PCG anang maong hitabo.

Sa buwag nga gipagawas nga pamahayag, ang AFP miingon nga ang ikaduhang lantsa nga maghatud unta og supply wala makapadayon tungod sa maong hitabo. Gihulagway sa AFP nga sobra ra ug matawag nga opensiba na ang gihimo sa CCG.

“We call on the China Coast Guard and the Central Military Commission to act with prudence and be responsible in their actions to prevent miscalculations and accidents that will endanger peoples' lives,” matud pa sa AFP.

Sumala pa sa maong mga buhatan, kaning agresibong kalihokan sa China nakalapas sa  1982 United Nations Convention on the Law of the Sea ug sa 2016 Arbitral Award nga nag-ingong walay basihan ug walay katungod nga angkunon sa China ang lugar.

Ang Beijing nangangkon nga ilaha ang halos tibuok South China Sea ug padayong nagpabungol-bungol ug dili modawat sa international ruling nga nagbasura sa ilang mapanakop nga pangangkon sa kadagatan.

Sa nakalabay nga semana, ang Senado mipagawas og resolusyon nga nagkondenar sa China sa padayon niining pagpanghasi sa mga Pilipino diha sa WPS.

Sa pikas bahin, ang Estados Unidor mikondenar sab sa CCG sa pagbabag ug pagbomba nila og tubig sa barko sa Pilipinas kay matud pa direkta nilang gibutang sa peligro ang kahapsay ug kalinaw sa rehiyon.

“Firing water cannons and employing unsafe blocking maneuvers, PRC ships interfered with the Philippines’ lawful exercise of high seas freedom of navigation and jeopardized the safety of the Philippine vessels and crew,” sumala pa sa US State Department.

“By impeding necessary provisions from reaching the Filipino service members stationed at Second Thomas Shoal, the PRC has also undertaken unwarranted interference in lawful Philippine maritime operations,” dugang pa niini.

Gihimug-atan sa US nga walay legal nga katungod ang China sa pagpangangkon niini sa kadagatan palibot sa Ayungin Shoal— nga gitawag sab nga Second Thomas Shoal— tungod kay kini naa sa sud sa exclusive economic zone sa Pilipinas.

Ang Washington mipasidaan nga bisan unsa nga armadong pag-atake sa mga barko o abyon sa Pilipinas sa sibilyan man o sa militar isipon kini nila nga pagatake sab kanila ug obligado sila nga motuman sa 1951 Mutual Defense Treaty.

Sa tweet ni Australian Ambassador to the Philippines HK Yu, mipadayag kini sa kabalaka sa matud pa “dangerous and destabilizing” nga gibuhat sa CCC sa PCG.

Samtang si Japanese Ambassador Koshikawa Kazuhiko mihulagway nga ang pagbabag sa legal nga kalihokan diha sa kadagatan sa Pilipinas ug pagbutang sa peligro sa kinabuhi sa mga sakop sa PCG “totally unacceptable.” — IBM (BANAT NEWS)