CEBU, Philippines — Unom ka mag-uuma nga mga miyembro sa Barangay Antipolo United Farmers Association (BAUFA) sa Lungsod sa Tuburan maka-harvest na unya kini og gatas human nakadawat og 50 ka imported nga baka nga gatasan (Holstein Jersey Dairy) gikan sa Department of Agriculture-National Dairy Authority (DA-NDA7).
Matud sa DA-7 nga ang mga imported nga baka nga gikan sa Australia mabdos na ug gipaabot nga manganak karong buwan sa Septiyembre.
Ang maong matang sa mga baka maka-produce og average nga 10 ngadto sa12 ka litro nga gatas ug moabot pa kini (potential nga production) sa 15 ngadto sa 20 ka litro kong husto ang pagdumala.
Base sa gibana-bana nga kwentada sa mga kawani sa NDA, ang usa ka dairy farmer nga adunay gibana-banang ani nga 10 ka litro nga gatas kada adlaw nga gibaligya sa tag P40 matag litro (buying price) adunay gross income nga P400 kada adlaw o net income nga P15 matag litro (ang P25 mao kini ang gasto sa produksiyon) adunay net income nga P150 kada adlaw alang sa usa ka baka.
Ug kong ang mag-uuma adunay tulo ka baka, kini adunay net income nga P 450 kada adlaw o monthly net income nga P 13,500 diin ang maong kita motaas o mokunhod depende sa ma-harvest nga gatas matag adlaw.
Aron pagsuporta sa ilang produksiyon sa gatas, gipang-apod-apod usab ang 10 ka milking cans nga adunay 40 ka litro nga kapasidad, dairy safety kits ug uban pang mga ekipo, samtang ang Cebu Federation of Dairy Cooperatives (CEFEDCO) maoy magsilbing buyer-processor sa gatas nga ihatod sa mga mag-uuma sa BAUFA. Ang agri-intervention, matud ni NDA-7 Regional Manager Monina Mangubat, atol sa bag-ohay nga turnover ubos sa Intensified Community-Based Dairy Enterprise Development Program nga nagtumong sa pagpadaghan sa mga dekalidad nga baka alang sa dairy production, paghatag og panginabuhian sa mga mag-uuma ug pagpataas sa produksiyon sa gatas sa nasud.
Gidasig ni DA-7 Regional Technical Director Wilberto Castillo ang mga mag-uuma nga beneficiaries nga atimanon pag-ayo ang mga proyekto.
Nitambong sa turnover sila si Tuburan Mayor Democrito Diamante, kanhi NDA Administrator Grace Cenas, Tipolo Barangay Captain Roel Sincero, opisyales sa lokal nga kagamhanan ug barangay.
Si Senador Cynthia Villar, kinsa maoy chairperson sa Committee on Agriculture and Food nipadayag usab sa iyang suporta pinaagi sa usa ka video message. —/BDB (BANAT NEWS)