CEBU, Philippines — Hingpit na nga giablihan ang bag-ong nakonkreto nga dalan sa lungsod sa Dumanjug, habagatang Sugbo.
Ang Ilaya-Kantangkas-Pawa road section nga nagkantidad og P104.8 million giinagurahan sa mga opisyal sa Kapitolyo gipangulohan ni Gobernador Gwendolyn Garcia niadtong Agosto 4, 2023.
Ang maong karsada maoy agianan sa tulo ka barangay nga mao ang Ilaya, Kantangkas ug Pawa.
Si Dumanjug Mayor Gungun Gica sa iyang pagpamulong nagpasalamat kang Gov. Garcia gumikan sa iyang way hunong nga suporta sa ilang lungsod ilabi na sa pagpatuman sa mga proyekto sa infrastraktura nga makahatag og kalambuan sa kalungsuran.
Mitambong usab sa kalihukan mao si Congressman Peter John Calderon ug Board Member Cesar Baricuatro ingon man ang ubang mga mayor sa ikapitong distrito.
Gawas sa inagurasyon sa maong dalan, gipangulohan usab ni Garcia ang inagurasyon sa bag-ong giayo nga heritage house sa Brgy. Ylaya sa lungsod gihapon sa Dumanjug.
Mokabat sa P1.7 million ang nagasto sa Kapitolyo alang sa restoration works sa ancestral house nga gitukod niadto pang 1850s.
Sa taho sa Capitol Information Office, si Victor Tan Jr. nagkanayon nga iyang gidonar ang maong balay ngadto sa Probinsya sa Sugbo niadtong 2011 aron mapreserve ang ilang ancestral house ug makita sa umaabot nga henerasyon ang mga antiques sulod sa balay. Sa iyang pagpamung gipasalamatan ni Gov. Garcia ang pamilyang Tan gumikan sa ilang pag donate sa ilang balay ug iyang gipasalig nga paningkamotan nga mamintinar og tarong ang maong propedad. — /MEL (BANAT NEWS)