CEBU, Philippines — Ipahigayon ugma ang admission examination sa Philippine National Police Academy (PNPA) diha sa University of Cebu Banilad Campus.
Nasayran nga pipila ka mga kadete sa PNPA ang anaa karon sa Sugbo kinsa sila ang mag-facilitate sa admission examination sa regular examinees nga naka-register sa online, cross examinees nga lahi nga testing center apan anaa sila sa Cebu nagpuyo lakip na ang walk-in applicants nga wala maka-register sa online nga iproseso karong adlawa.
Sa mga interesado nga mokuha sa pasulit kinahanglang magdala kini og birth certificate, BMI form nga pirmado sa doktor ug nakalatid didto nga ‘physically fit’ nga moagi sa grabeng training sa PNPA, unom ka 2x2 picture nga adunay nametag, mag-una ang last Name, first name ug middle name, magdala usab og valid ID apan kon wala niini pwede ang police clearance gikan sa local ug national. Nasayran nga 1,733 ang mokuha sa pasulit sa Cebu.
Ang edad sa pwedeng mokuha sa pasulit 22-anyos sa dili pa sa Hulyo 1, 2023 ug ang pinakaubos nga edad aron makasulod kay 18-anyos.
Giklaro sa mga kadete nga wala nay isyu sa hazing sa akademiya diin wala na kini gitugot.
Gihulagway sa mga kadete nga ang advantage kon mosulod sa PNPA mahatagan og allowances ug makatabang kini aron mahimong disiplinado ug makat-on sa mga angayan nga kat-onon aron sa ilang paggradwar andam na kini. BDB (BANATNEWS)