Mandaue adunay overdue nga unliquidated cash advances

CEBU, Philippines — Ang Commission on Audit-7 nirekomendar sa kagamhanan sa Dakbayan sa Mandaue pinaagi sa city accountant kinsa niuyon nga maningkamot sa pagpangita sa mga responsable nga opisyal nga adunay dugay nang na-overdue nga cash advances ug pag-isyu og mga demand letter alang sa liquidation niini ilabi na kadtong konektado gihapon sa siyudad.

Ang COA niluwat sa maong rekomendasyon human sa ilang 2022 Annual Audit Reports sa Dakbayan sa Mandaue diin nasuta nga ang cash advances nga gihatag ngadto sa mga opisyal ug empleyado sa siyudad nga nikabat ngadto sa P10,566,430.25 nagpabiling wala ma-liquidate sukad niadtong Disyembre 31, 2022.

Matud sa COA nga nahitabo kini bisan og dugay na nga nahuman ang katuyoan sa maong mga cash advance sukwahi sa Section 89 sa PD No. 1445, COA Circular No. 97-002 ug IPSAS I, nga nakaapekto sa timing sa expense recognition.

Ang Section 89 sa PD No. 1445 o Government Auditing Code of the Philippines naglatid nga ang cash advance i-report ug i-liquidate human nga ang katuyoan niini nahatag na o natuman.

Dugang pa, gisubli sa COA Circular No. 97-002 uban ang pag-amendar sa mga lagda ug mga regulasyon sa paghatag, paggamit ug pag-liquidate sa cash advances.

Ang pag-review sa financial statements nagpakita nga sa Disyembre 31, 2022, ang siyudad adunay wala ma-liquidate nga cash advances nga nikabat ngadto sa P10,566,430.25  nga kinahanglan na’ng i-liquidate.

Namatikdan usab sa audit team nga adunay mga wala ma-liquidate nga advances nga nahatag niadtong tuig 1996 ug ang mga hingtungdan nga accountable officers dili na kini konektado sa ahensiya.

Matud sa audit team nga base sa ilang Interview sa accounting personnel ang nagdumala sa pag-monitor sa cash advances nibutyag nga P2,348,967.84 o 22 porsyento sa kinatibuk-ang unliquidated balances maoy advances sa accountable officers nga dili na konektado sa ahensiya ug pipila kanila namatay na.

Giingong ang mga demand letter gipadala ngadto sa pipila ka mga accountable officers nga adunay dugay na nga over-due accounts apan gibalik tungod kay dili mao ang address. Nasayran sa audit team nga ang accounting office wala pa mag-isyu og demand letters ngadto sa mga accountable officer kinsa konektado gihapon sa siyudad nga adunay unliquidated cash advances.

Subay niini, ang audit team nirekomendar usab nga ang city accountant maoy mopasiugda sa mga pamaagi ug motuman sa mga documentary requirements ubos sa COA Circular 2016-005 alang sa write-off sa wala ma-settle nga balanse sa mga namatay nga accountable officers.

Dugang rekomendasyon sa team nga ang city accountant moila sa hinungdan sa negatibo nga mga balanse ug epekto sa kinahanglan nga adjusting entry alang sa tukma nga reflection sa unliquidated cash advance sa financial statements.

Nasayran usab sa audit team nga ang bahin sa mga barangay sa koleksiyon sa Real Property Tax (RPT) nga nagkantidad og P6,862,237.55 niadtong Disyembre 31, 2022 natala isip kita sa siyudad ug ang barangay shares alang sa calendar years 2017 hangtud sa 2022 nga nikabat sa P33,060,025.32 ang gipabilin sa siyudad imbes ipang-apod-apod ang maong kantidad ngadto sa component barangays sa siyudad nga required ubos sa Section 27. (b) sa Republic Act No. 7160 ang Local Government Code of 1991, sa ingon, ang government equity ug ang liabilities accounts gipasobra ug gipaubos diin supak kini sa IPSAS 1. —/BDB (BANAT NEWS)