Mga barangay kapitan gipanawagan sa TWG sa Task Force Gubat sa Baha

CEBU, Philippines — Ang Technical Working Group sa Task Force Gubat sa Baha nanawagan sa mga barangay kapitan sa mga dapit nga bahaan sa Dakbayan sa Sugbo nga motambong sa usa ka importante kaayong tigom karong Miyerkules diha sa mayor’s conference room.

Si retired army colonel Jefferson Omandam nipahibawo sa maong tigom sa Barangayan, Bayanihan, Boluntarismo special assistant ni Mayor Michael Rama nga si Ramil Ayuman ug sa City Health Department’s assistant head, Dr. Jefferey Ibones a XFM kagahapon.

Matud ni Omandam nga importante kaayo nga makatambong sa maong tigom ang maong mga barangay kapitan aron ilang maplano ang schedule subay sa massive dredging ug de-silting ug de-clogging sa mga suba ug sapa sa dakbayan.

Gikinahanglan kaayo karon ang dredging ug de-silting aron mamenosan ang pagbaha sa dakbayan ilabi na sa downtown area samtang wala pa ma-full blast ang pagbawi sa three-meter easement. Si Omandam nagkanayon nga nalipay sila nga ang Department of Public Works and Highway nakigtambayayong ug nakigsabot nga motrabaho uban sa Department of Engineering and Public Works sa dakbayan alang sa mga dredging efforts niini.

Gawas sa DPWH, ang City Health Department, PROBE, CESET ug Cebu City Police Office ug uban pang ahensiya sa gobiyerno gilaoman usab nga mopaabot sa ilang tabang ug masiguro nga maayo ug hapsay ang tanan. Sa dili pa mo-full blast sa pagbawi sa mga suba sa siyudad gikinahanglan pa sa kagamhanan ang relocation site alang sa mga apektadong residente.

Gihinaot nga ang transitional housing magamit na karong buwan sa Oktubre. — /BDB (BANAT NEWS)