Mga LGUs sa Central Visayas gipasidunggan atol sa paglusad sa BIDA

CEBU, Philippines — Nagmalampuson ang paglusad sa bag-ong kampanya kontra ilegal nga drugas nga Buhay Ingatan Droga'y Ayawan (BIDA) Bayanihan ng Mamayan  nga gipasiugdahan sa Department of Interior and Local Government pinangulohan Secretary Benhur Abalos Jr. diha sa Hoops Dome sa Lapulapu City kagahapong adlawa.

Ang kalihokan gisubhan pinaagi sa BIDA Bayanihan ng Mamayan Fun Run2023 sayo sa kaadlawon nga gisalmutan og kaliboan ka tawo gikan sa nagkalain-laing hugpong sa katilingban ug mga ahensiya sa gobiyerno partikular na ang mga sakop sa nagkadaiyang LGUs sa kabisay-an.

Nangulo si Lapu-lapu City Mayor Junard "Ahong" Chan uban nila ni Lone District Representative Cindi King-Chan, Mandaue City Mayor Jonas Cortes ug Cebu Governor Gwendolyn Garcia, niabi-abi ni Abalos sa hamubo nga programa sa wala pa ang pagsugod sa dagan.

Ang DILG Secretary nihatag ug Certificates sa Cebu Provincial Government, Lapu-lapu, Mandaue ug Cebu City tungod sa ilang exemplary efforts sa pagkombati may kalabutan sa illegal nga drugas.

Sumala pa ni Chan, ang pagmata nila ug sayo uban sa katawhan nagpakita lang kini sa sakripisyo ug pagpakabana sa mga sugbuanon ug oponganon nga kontra sila sa illegal nga drugas.

Mapasalamaton ang mayor kang Abalos sa pagpili sa Dakbayan sa Lapu-lapu alang sa venue sa maong kalihukan. Si City Police Director, Police Colonel Elmer Lim sa Lapu-Lapu City Police Office nibutyag nga niabot ngadto sa dili mominos 25 mil ka mga tawo ang niapil sa maong kalihukan.

Ang DILG niila usab sa mga naglihok nga Anti-Drug Abuse Councils sa pipila ka mga kalungsuran ug dakbayan sa rehiyon 7 sa ilang outstanding performance atol sa calendar year 2022.

Ang mga gipasidunggan mao ang  Poro, Camotes Island, Cebu;San Francisco, Camotes Island, Cebu; San Juan, Siquijor Talisay City, Cebu; City of Naga, Cebu; Bogo City, Cebu; Danao City, Cebu; Alegria, Cebu Barili, Cebu; Borbon, Cebu; Daanbantayan, Cebu; Madridejos, Cebu; Pinamungajan, Cebu; Samboan, Cebu; San Remigio, Cebu; Sogod, Cebu; Tuburan, Cebu; Tudela, Camotes Island, Cebu.

Ang fun run nakamugna og grabeng kabug-at sa trapiko ilabi na sa Maximo Patalinjug Avenue humann usa ra ka lane ang nagamit sa mga motorista gikan  Mactan-Mandaue Bridge subay sa maong dapit. Decemay Padilla, ug Romeo Limpangog/IBM