73-anyos duna nay 62 ka apo nagpatuli
CEBU, Philippines — Dili pa uwahi ang tanan para sa usa ka 73- anyos nga lalaki nga nakadesisyong magpatuli bisan paman sa iyang pangidaron.
Ang iyang pagpatuli gigantihan hinuon ni Lapu-Lapu City Mayor Junard “Ahong” Chan og P20 mil. Ang siyudad milusad og tulo ka adlaw nga programang libreng tuli para sa mga Oponganon.
Niadtong nakalabay nga Huwebes, tulo sab ka mga lalaking nagpangidaron og lapas 20 anyos ang nipatim-aw sa Hoops Dome aron magpatuli. Aron pag-ila sa ilang kaisog nga nagpatuli, gipanghatagan sila sa mayor og tag P10 mil isip ganti kay para sa mayor dili siya gustong dunay lalaking Oponganon nga pisot.
Tingali tungod ba pud kaha sa gibuhat sa tulo, naengganyo sab ang 73-anyos nga magpatuli sab diha sa Hoops Dome kagahapon adlaw nga Biyernes, Hulyo 28, 2023.
Ang maong 73-anyos taga Barangay Calawisan ug duna na kini pito ka mga anak ug 62 ka apo.
Si Chan sa iyang Facebook Page post miingon nga dili babag ang edad sa pagsanong sa iyang panawagan nga: “Walay apo ni Lapulapu nga pisot.”
Agi og pagdayeg sa pagsanong sa senior citizen, gi-doble pa sa mayor ang reward nga iyang gihatag.
Matud pa sa maong lolo, paghuman og tuli kaniya “maimpas gayud ang tanan niyang utang ini’g uli” tungod sa dakong kwarta nga iyang nadawat.
Niadtong adlaw nga Huwebes, ang unang tulo ka mga hamtong nga nakadawat sab og ganti tag P10 mil matag usa human sila nagpatuli, nagpangidaron na og 22, 25 ug 28 anyos.
Sa kinatibuk-an P50,000 na ang nahatag nga cash reward sa Mayor. Gie-Ann Tapic, CNU Intern, IBM (BANATNEWS)
- Latest