2 patay, 7 angol sa aksidente

CEBU, Philippines — Duha ang patay samtang pito ang naangol sa nahitabong disgrasya diha sa national highway sa Barangay Guibuangan, Lungsod sa Barili kagahapon sa buntag. Ang namatay mao si Irish Omagac, 14-anyos, residente sa nahisgutang barangay  ug Lilibeth Hivera Devaras, 58-anyos, minyo, lumad nga taga Valencia, Bukidnon. Samtang ang mga naangol mao sila si Francis Cortez Pagatpat, 25, ulitawo, taga Barangay Sabang, Dakbayan sa Danao, drayber sa Toyota Hi-Ace commuter van ug ang iyang mga pasahero nga sila Nevelle Anaba Devaras, 66, Kurt Josh Gevere Mangasi, 28,  Kathlyn Genevere Mangasi, 28, ug Kurtly Herera Mangasi, 30, pulos taga Valencia, Antonio Edson Natividad Enriquez, 26 ug si Princess Dawn Sombreo Espina, 27, pulos taga V. Rama, Dakbayan sa Sugbo.

Si Police Master Sergeant Gilbert Encabo ug Police Staff Sergeant John Robert Sacan, trafffic investigators sa Barili Police Station nagkanayon nga ang maong van nga gipanag-iya sa RIJETT Ca Rental Services naggikan sa Dakbayan sa Sugbo ug padulong ngadto sa habagatan. Apan pag-abot diha sa lugar nga nahitaboan giingong nagpakusog kini og dagan ug nitipas sa pikas nga lane aron mo overtake sa laing sakyanan apan nabanggaan niya si Ogamac kinsa naglakaw niadtong higayona padulong unta nga mopalit og mantika. Ug tungod sa ka kusog sa impact naglagpot si Omagac ug nakaangkon og grabeng kadaot sa lawas nga hinungdan sa iyang kamatayon.

Samtang ang drayber wala na nakakontrol sa iyang gimaneho nga van nilahos kini og bangga ngadto sa punoan sa caimito diha sa kilid sa karasada ug ni resulta kini sa pagkaangol sa mga pasahero.  Ug gumikan sa ka kusog sa impact nabali ang caimito ug namatay ang usa sa mga pasahero niini nga si Devaras.

Ang mga biktima dali nga gidala sa duol nga tambalanan ug gibalhin sa tambalanan sa Dakbayan sa Sugbo. — Paolo Anton Nabaja, Rowena D. Capistrano (BANAT NEWS)