Sanitary landfill tukoron sa Bogo

CEBU, Philippines — Usa ka sanitary landfill ang itukod didto sa dakbayan sa Bogo alang sa mga basura sa maong siyudad.

Gihimo ang groundbreaking ceremony niadtong Hulyo 24 alang sa Bogo City Integrated Sanitary Landfill Facility didto sa Barangay La Paz, Bogo City.

Ang maong landfill nga giingong labing una sa amihanang bahin sa Probinsya sa Sugbo, adunay gilapdon nga 7.2 ektarya ug gipondohan sa lokal nga kagamhanan sa Bogo.

Ang pagtukod sa maong landfill nasubay sa Akta Republika 9003 o ang Ecological Solid Waste Management Act nga nagmando sa mga local government units nga kinahanglan aduna kini kaugalingon nga waste management facility alang sa mga basura sa lugar.

Sumala sa LGU sa Bogo kasamtangang ilabay ang basura sa siyudad sa Asian Energy Systems Corporation nga usa usab ka sanitary landfill sa lungsod sa Consolacion, Cebu sukad nga gisirad-an ang dumpsite sa dakbayan niadtong 2016.

Ang pagtukod sa integrated sanitary landfill gilauman nga mahuman sulod sa 390 ka adlaw ug gipaabot nga molungtad kini og 20 ka tuig.

Ang maong pasilidad adunay composting facility; material recovery facility para sa recyclable materials; hazardous waste storage; fully engineered with High-Density Polyethylene (HDPE) liner ug waste water treatment facility for the leachate.

Samtang didto sa Tuburan sugdan na karong Agosto 1 sa lokal nga kagamhanan ang “No Segregation, No Collection” nga polisiya niini. Kini gumikan kay magsugod na og operate ang makina sa pag recycle sa mga basura sa lungsod aron dali ang proseso sa paglahi-lahi sa mga basura.

Subay niini adunay schedule sa pagkolekta sa mga basura sa mga barangay sa Tuburan diin kolektahon inig ka buntag ang mga malata nga basura samtang dili pud malata ang kuhaon inigka hapon. MEL (BANATNEWS)